Ang integridad at kredibilidad ni Luis Manzano ang dalawa sa mga dahilan kaya positibo ang mga komento tungkol pagkakaabsuwelto niya sa reklamong isinampa ng mga investor laban sa Flex Fuel Petroleum Corporation.
Read: NBI absolves Luis Manzano in syndicated estafa complaint vs Flex Fuel executives
Marami ang naniniwalang inosente si Luis at nadamay lamang ito dahil siya ang celebrity ambassador ng kompanyang pag-aari ng kanyang dating matalik na kaibigan, si Flex Fuel President Ildefonso “Bong” Medel Jr., na sumira at umabuso sa pagtitiwala niya.
Syndicated estafa ang kasong pormal na isinampa ng National Bureau of Investigation (NBI) laban kay Medel Jr. at sa ibang mga opisyal ng Flex Fuel.
Hindi kasama si Luis sa mga sinampahan ng kaso ng NBI sa Taguig City Prosecutor’s Office dahil nagbitiw siya bilang isa sa mga incorporator ng kompanya noong 2021.
Bukod sa utang sa kanya ng Flex Fuel na PHP66 million, naghain din si Luis ng reklamo sa NBI. Siya rin ang nilapitan at hiningan ng tulong ng mga investor na hindi mabawi ang kanilang mga puhunan.
Read: Luis Manzano seeks NBI's help to investigate Flex Fuel Corporation
Ang businesswoman na si Jinky Sta. Isabel ang isa sa mga investor ng Flex Fuel, at siya ang spokesperson ng mga nagrereklamo.
Kahit kabilang si Luis sa mga biktima, siya ang idiniin ni Jinky nang magpainterbyu ito sa mga news program noong February 2023 tungkol sa reklamo nila laban sa kompanya ni Medel.
“Kung gusto ninyo itong bayaran o i-settle ito, tutal nasa inyo yung mga pera namin, gawin niyo na po as early.
"Kasi kami naman po, ilan lang kayong incorporators versus 130-plus complainants. Saan naman po yung hustisya doon?
“Kaya kung ako sa yo, Sir Luis, i-settle niyo na po yung mga investor ninyo at makakatulog na tayo nang mahimbing tutal nakinabang naman po kayo sa pera namin,” pahayag ni Jinky sa mga news program na inikot niya para idiin at sisihin si Luis.
Read: Luis Manzano in hot water over investment issue involving "childhood friend"
Pamilyar ang pangalan ni Jinky Sta. Isabel dahil naging laman din siya ng mga balita sa mga pahayagan at TV news program noong January 2017.
Nasangkot ang kanyang asawang si SPO3 Ricky Sta. Isabel sa kidnapping at pagpatay sa South Korean businessman na si Jee Ick-joo, na inakusahang sangkot sa pagbebenta ng illegal drugs, noong October 18, 2016.
Si Ricky ang pangunahing suspek sa pagdukot at pagpatay sa pamamagitan ng pagsakal sa biktima sa Camp Crame grounds. Malaking balita noon ang krimen dahil nangyari ito sa loob ng Camp Crame.
Dinala ang bangkay ni Jee Ick-joo sa isang punerarya sa Caloocan City para i-cremate, saka itinapon sa toilet bowl ang abo ng kanyang mga labi.
Inimbestigahan ng senado ang karumal-dumal na krimen.
Si Senator Grace Poe ang nagsabing dapat isama sa imbestigasyon si Jinky dahil walong libong piso lamang kada buwan ang suweldo ni Ricky bilang pulis, pero nagkakahalaga ng P20.3 million ang net worth ng mag-asawa.
Ikinatuwiran ni Ricky sa senado na cum laude si Jinky nang magtapos ito ng law sa Manuel L. Quezon University pero hindi kumuha ng bar exam.
Inilahad ni Ricky na matalino ang kanyang asawa at nagkaroon sila ng pera dahil sa mga negosyo ni Jinky tulad ng lotto outlet, insurance, Bayad Center, at Western Union franchise.
Sa kabila ng paliwanag ni Ricky, sinabi ni Poe na dapat silipin ang tax records ni Jinky.
Noong January 21, 2023, nagpatawag si Jinky ng press conference sa tahanan nila para patunayang inosente sa kasalanan na ibinibintang ang kanyang asawa.
Ipinakita ni Jinky sa mga miyembro ng media ang mga footage mula sa CCTV at larawan ng aktuwal na pagdukot kay Jee, pero iginiit niyang fall guy lamang si Ricky at hindi ito ang lalakeng nakunan na nagwi-withdraw ng pera mula sa ATM.
Noong June 6, 2023, reclusion perpetua o habambuhay na pagkakakulong ang hatol ng Branch 60 ng Regional Trial Court ng Angeles City, Pampanga, sa asawa ni Jinky.
"Guilty beyond reasonable doubt of the special complex crime of Kidnapping with Homicide under Article 267" ang desisyon ng korte tungkol sa kaso ng pagpatay ni Ricky sa South Korean businessman.